本土教育~B-6.鼓勵學校及教師以母語為主題進行創作、研究及發表

B-6.鼓勵學校及教師以母語為主題進行創作、研究及發表

(一)學校辦理母語日學生戲劇創作發表會

(二)鼓勵老師母語詩歌創作發表

(三)教師參加本土語言相關研習

(四)鼓勵教師自編本土教材/學習單

1.自編林園本土故事教材

林半仙求泉水          作者: 廖惠娟

    講到林園的故事，逐家第一个著會想到林半仙。林半仙是啥人物?為啥物遮出名? 話講清朝的時，福建有真濟人來台灣討食，其中有一个討海人過身，做伙掠魚的人就凊彩佇鳳鼻頭附近揣一个山洞共伊埋起來。

    後來伊的後生胡文海赴京考試，毋但金榜題名，而且做甲總兵大人。胡文海誠有孝心，想欲共老父撿骨”請”轉去祭拜，就倩七个地理師來台灣辦這件代誌，林半仙就是其中一个。

    這陣人佇鳳鼻頭附近，揣到胡文海老父的墓，發現遮是一个風水誠好的”石龜穴”，祖先埋佇遮會致蔭囝孫大富大貴，人講「罟籃貯萬兵」，胡文海會當做甲總兵大人就是這个緣故。

    林半仙算出這隻石龜是陸龜，無適合坐船過海，埋佇遮的祖先嘛仝款。伊苦勸逐家毋通共這骨頭徙轉去，毋過逐家毋聽伊的話，抑是欲將骨頭請轉去。

    林半仙算出轉去的這逝路是凶多吉少，就跤底抹油、阿婆仔閬港旋嘍！其他的人佇轉去的路中，真正拄著大風雨，全船的人無一个逃過死劫。胡文海的官運嘛開始毋順序，甚至佇一擺戰事中過身去！

    林半仙沿著鳳鼻頭向北行，盤山過嶺來到清水巖山跤－林仔邊，就是現此時的林園。彼陣是農業社會，無𥴊仔店買物件食，林半仙行甲足枵足忝，路邊拄好有一陣作穡人咧歇睏食晝，看伊誠可憐，就分中晝頓予伊食，林半仙足感動。

    林半仙想欲感謝作穡人，就問上需要啥物? 講:「阮作穡人上需要水，毋過遮無水源，愛看天食穿。雨水足，阮就有好收成；若無就愛食番薯籤攪豆油。」伊聽了後，決定欲幫林園人作法求泉水。

 林半仙算著一个好時辰，彼一工伊手提七星劍，要求村民佇伊問話時愛應「有」。伊開始作法，當伊問:「有水無?」有人應:「無！」法會就破功嘍！村民失望倒轉去，就開始懷疑伊的功夫！

 後來林半仙閣算出一个好日欲求水，伊再三交代這擺一定愛應「有」，伊就佇現此時的靈泉池開始作法，伊喝:「有水無?」逐家攏應: 「有喔！」伊將七星劍插入塗跤，泉水就開始濆出來，而且流到鳳林路口的茄苳樹跤才停落來。

    林半仙求泉水的代誌開始傳出去，無偌久伊佇林園就成做一个足有名的人！

參考文獻:

1.         《林園鄉志》，高雄縣林園鄉公所，2010年

2.     朱永昌《頂林仔邊風雲 林園文史故事》，高雄市政府文化局，2013年

2.自編林園地名大富翁遊戲教材

3.自編逐家來寫詩學習單